Владимир Путинниң инаугурация езулалында Тываның делегациязын Владислав Ховалыг баштап чораан

Владимир Путин күрүне баштыңынга база катап соңгуткаш, майның 7-де Россияның Президентизи албан-дужаалче албан езузу-биле кирген. Улуг Кремль ордузунуң Андреев залындан инаугурация езулалының дорт дамчылгазын көргүскен. Езулалга ийи муң ажыг киришкен. Тывадан делегацияны республика баштыңы Владислав Ховалыг удуртуп чораан.

Россияның Күрүне Тугун, Президент Штандартын, Россияның Конституциязын база Россия Президентизиниң ылгавыр демдээн Улуг Кремль ордузунуң Андреев залынче байырлыы-биле киирип эккээрге, езулал эгелээн.

Федерация Чөвүлелиниң кежигүннериниң, Күрүне Думазының депутаттарының база Россия Федерациязының Конститусчу Судунуң судьяларының мурнунга, Владимир Путин Россия Федерациязының Констициязының 82 чүүлү езугаар Россияның чонунга даңгыраан берген. Конститусчу Судтуң даргазы Валерий Зорькин Владимир Путинниң Россия Федерациязының Президентизи албан-дужаалче киргенин чарлаан.

Президентиге алдар болдурган 30 дааштаашкынныг салют-биле инаугурация езулалы доозулган. Регионнуң командазынче парламентарийлерден аңгыда, соңгулдаларга Владимир Владимирович Путинни төлээлээн бүзүреттинген кижилер база киргенин Владислав Ховалыг бодунуң блогунда бижээн. Дорт дамчыдылга кадрларында, бирги одуругда Россияның Маадыры Мерген Донгакты көрүп болур.

«Владимир Владимирович Россия Федерациязының Президентизи албан-дужаалынче кирген. Ооң ачызында, бөгүн Россия – күштүг, демниг, чаңгыс сорулга-биле каттышкан болгаш келир үеже херии баскан чурт апарган – деп, Владислав Ховалыг бодунуң блогунда болуушкунну тайылбырлап бижээн. – Хостуг, бот-догуннаан болгаш күштүг Россия дээш хөй националдыг Тыва бир үн-биле шиитпирлиг бадылаан! Боттарның үнелиг чүүлдерин, боттарының амыдырал байдалын, чурттуң чаңгыс демин кадагалап камгалаар дээш, моон-даа соңгаар эп-найыралдыг чоруурувуска бүзүрээр мен».

Марттың 15-тен 17-ге чедир чуртка эрткен президент соңгулдаларынга Владимир Путин российжилерниң эң хөй - 87,28 хуу үнүн алгаш, тиилээнин сагындыраал. Соңгулдаларга келиишкин - 77,49 хуу болган. Тыва Путинге эң улуг бүзүрелди берген регионнарның санында: чурттуң баштыңы республикадан 180 902 үннү алган, соңгукчуларның ниити санының 95,37 хуузу. Чаа соңгуткан Президент чуртту дараазында алды чылда - 2030 чылга чедир удуртуп баштаар.