Сергей Уюсов: «Бөгүн ажылчыннарывыс төлептиг акша шалыңны ап турарлар»

«Восток» КХН-ниң чиңгине директору Сергей Уюсов “Тыва Республиканың күш-ажылдың Маадыры” бедик атты алган. «Восток» башкарыкчы орук бүдүрүлгези «Айыыл чок болгаш шынарлыг автооруктар» национал төлевилелдиң сорулгаларын мурнады боттандырып, база ажыглап каапкан автодугуйлардан резина плиткалар база брусчатка бүдүрүлгезин бот-тускай социал-экономиктиг хөгжүлде программазы-биле хөгжүткен. Бүдүрүлге ынчалдыр орук инфраструктуразындан аңгы ажылдарны база эгелээн. Тускайжыттынган тудуг чери болур ниитилел школалар база амгы үениң чуртталга комплекизиниң тудугларын шалыпкын тудуп турар.

Сергей Уюсов «Восток» КХН-ниң бүгү коллективиниң ажылынга бедик демдекти бергенинге четтиргенин илереткеш, бөгүнде бүдүрүлге тудуг адырында шупту айтырыгларны шиитпирлежип турарын дыңнаткан.

- Ийи чыл бурунгаар, аварийлиг чуртталга бажыңнарындан өскээр көжүрүлде, өскүс уругларга чурттаар оран-сава хандырылга күрүне программаларындан өскеде, чуртталга тудуу шуут чорбайн турган – деп, Уюсов сагындырган. – Бөгүн элээн каш тускай тудуг организациялары бүрүткеттинген, ипотека чээлизи-биле тудуг чоруп, школалар болгаш уруглар садтары, культура албан черлери туттунуп турар. Совет үеде безин ынча хөй социал чуртталга бажыңнары, культура болгаш өөредилге объектилери туттунмайн турган. Совет үениң соонда деңнелден бо хүннерде ажыл чоктарның саны эң эвээш, чүгле харын, ажыл тып алырынга бергедээн профессионал ажыл чоктар арткан боор. Роснефть, Газпромнуң ышкаш шалың төлевири-биле чижип шыдавазывыс шын, ынчалза-даа бөгүнде ажылчын мергежилдиг кижи өг-бүлезин чемгерип, ажы-төлүн өөредип алыр төлептиг шалыңны ап болур.

Частың болгаш Күш-ажылдың байырлалы – бүгү-ле байырлалдар-биле байыр чедирип тур мен, күзеп чораан күзелдериңер амыдыралга боттаныр болзун.