Тываның бичии спортчулары «Азияның уруглары» VIII оюннарга киржир

Сибирь федеральдыг округтуң командазынче кирген Тыва Республикадан 122 спортчу «Азияның уруглары» VIII оюннарга киржир. Тыва спортчулар якуттарның хапсагай болгаш түрк чамдык чоннарның кураш хүрештеринге, ол ышкаш кикбоксингиге база дыңнавас уругларның хостуг хүрежинге күжүн шенежир. «Автомобилист» биле «Аялга» спортчу залдарынга бо хүннерде шилилде ужуражылгалар болуп эрткен.

«Азияның уруглары» - спорттуң хууда болгаш командалыг хевирлеринге, чайгы болгаш кышкы оюннарга уруглар ортузунга делегей маргылдаазы болур. Тывадан хостуг хүреш мөгелери немежип, бистен команда кежигүннери көвүдей бээри чадапчок.

«Шилилде чаданың түңнелинде, «Азияның уруглары» оюннарга бистиң округту төлээлээр Сибирьниң чыынды командазының составы июньнуң 1-ге чедир билдингир апаар. Ынчангаш спорттуң ол хевирлеринге округ деңнелинге бистиң оолдарывыс чедиишкинниг болурунга бүзүреп турар бис» - деп, Тываның спорт сайыдының оралакчызы Саян Монгуш чугаалаан.

Маргылдаалар июньнуң 26-да Якутск хоорайга болуп эртер, аңаа спорттуң 24 хевиринге 239 комплект медальдар дээш демисежир. Бо чылдың маргылдааларынга 22 чурт, ооң иштинде Азербайджан, Афганистан, Беларусь, Индонезия, Кыргызстан, Палестина, Сирия, Туркменистан, Узбекистан киржирин албан езузу-биле бадыткаан.
Эрткен чылдарда ук оюннарга Тывадан Эртине Иргит биле Булат Ооржак киришкенин сагындыраал. Олар спортчу хүрешке мөңгүн медальдарны чаалап алганнар.