Республикада «Тываның телешколазы» ажылын эгелээн

Өөредилге яамызы «Тува 24» база «ОТР» регионнуң дамчыдылга компаниязы-биле кады ниити өөредилге организацияларының өөреникчилеринге хүнде-ле үш кичээлдеп, видео кичээлдерни база видео консультацияларны хүннүң дамчыдар. 9 база 11 класстарның доозукчуларынга күрүнениң түңнел аттестация (ГИА) талазы-биле база шупту эртемнерге ОГЭ база ЕГЭ-ниң видеоконсультацияларын эрттирер. 

Бот-аңгылажыышкын үезинде уругларның ырактан өөренирин организастаар аргазы чок чурттакчылыг суурларда өөредилге чорудуун шынарлыг эрттиреринге телекичээлдер башкыларга болгаш өөреникчилерге дуза болур. 

2020 чылдың апрель база майның ажыл хүннеринде, тус черниң «Тува 24» телеканалының дамчыдылгазынга видеокичээлдерни база видеоконсультацияларны үндүрер. 

11 эртемге - математика, орус дыл, төрээн дыл, төрээн чогаал, физика, биология, химия, география, төөгү, ниитилел билиглери, англи дылга 1-ден 8 база 10 класстарга видеокичээлдерни эрттирер. 

Регионнуң эртемнер комиссияларның кежигүннери, регионнуң өөредилге-методиктиг каттыжыышкыннар кежигүннери, республиканың башкылары видеокичээлдерни база видеоконсультацияларны чорудар. 

ТР-ниң Өөредилге болгаш эртем яамызы биле “Тува 24” youtube-каналынга эфирже ооң мурнунда үнген видеокичээлдерни кайы-даа үеде көрүп болур. 

ТР-ниң Өөредилге болгаш эртем яамызының сайтызында кичээлдерниң расписаниезин салган.