Тывада бар 80 ИВЛ-аппараттарның кырынга, Россияның Кадык камгалал яамызындан 82 аппарат немей келирин манап турар

Апрель 1-ниң хүнү-биле алырга, Тывада коронавирус аарыг кижилер чок, ынчалза-даа серемчилелдиг болуулуңар деп, чаңгыс чер-чурттугларын республика баштыңы кыйгырган. 

«Эмчилер аарыг кижини дажыглап, эмчи дузазын көргүзеринге дериг-херекселди ажыглаарын шенеп, шиңгээдип көөрүн дилээн мен. Эмчилеривистиң кызымаккай чоруу-биле эмнелгени белен кылдыр боттары дерип алганын демдеглезе чогуур. Бо хүнде Тывада коронавирустуң чаа халдавырындан аараан таварылга чок. Ооң-биле оожургаан ажыы чок деп, чаңгыс чер-чурттугларымга база катап сагындырып тур мен. Марттың 30-ден эгелээн бот-аңгыланыр чурумну шыңгыызы-биле сагыыр херек. Эң эки камгалал – бажыңынга олурары болур.

 Кызыгаар эртип, республикаже кээп турар кижилерни корум-камгалаар структуралар күжү-биле хайгааралда алган бис. Ындыг хамаатылар бистиң республиканың девискээринде келгенин дыңнатпас-даа болза, бот-аңгыланыышкын база хайгааралдан ойлап шыдавас. Кызылдың аэропортунда, «Шивилиг» биле «Ак» доскуулдарда санитар постулары ажылын уламчылап турар. 

Чаңгыс чер-чурттугларым, серемчилелдиг болгаш медерелдиг болуруңарны силерден дилээр-дир мен. Улуг хоорайлардан чанып келген студентилер 14 хонуктуң бот-аңгыланыр чурумун сагыыры албан. Айтырыгларыңар бар болза, “изиг шугум” телефоннарынче долгаңар. Тываның Чазааның: 89235901323; Тываның Кадык камгалал яамызының: 89333141449; Роспотребнадзорнуң Тывада эргелелиниң: 89232641865; “изиг шугумнуң чаңгыс аай телефону”: 8 (39422)3-08-08» - деп, Тываның Баштыңы Шолбан Кара-оол дыңнаткан. 

Дүрген эмчи дуза төвүнүң база 1 дугаар республика эмнелгезиниң эмчилери COVID-19 аарыы кирип кээр болза, эмнелге албан черлери херек кырында хөделиринге беленин бадыткаан, деп Тыва Республиканың Кадык камгалал яамызы дыңнаткан. Шак-ла ындыг өөредилгелерни кожуун чергелиг шупту эмнелгелерде эмчи ажылдакчыларынга эрттирген. Россияның Кадык камгалал яамызының санаашкыннары езугаар, РФ-тиң Кадык камгалал яамызының шугумундан Тывага бо чооку үеде 40 ИВЛ аппараттар келир. Оон дараазында 42 санныг аппарат база келир. 

Амгы үеде ажылдап турар кадрларның мергежилин бедидер база специалистерни эде белеткээр сорулга-биле, үзүктел чок медицина өөредилгезиниң порталында ийи аңгы темага: «COVID -19: Пневмония база өкпениң вирустуг аарыглары (халдавырлыг эвес угланыышкынныг стационар эмчизиниң тактиказы)» база «Бажыңга бирги эмчи-санитар дузазын чедирерде, бир дугаарында чаа коронавирус инфекциязын (СOVID-19) диагностикалаары, эмнээри, профилактиказы» өөредилге модульдарын эмчи ажылдакчыларында чорудуп турар. 

749 эмчилер база 247 ортумак эмчи персоналы ол темаларга өөредилгени эрткен. 

Анестезия эмчи сестраларының немелде составын белеткээр кыскалаткан курсту республиканың эмчи колледжиниң баазазынга онлайн чурумунга эрттирер. Өөредилге курстары уламчылавышаан.