Тываның Баштыңы социал айтырыглар талазы-биле оралакчызынга Саида Сенгиини томуйлаан

Тываның Баштыңы Шолбан Кара-оол ол шиитпирни сайыттар кабинединиң хуралында дыңнаткан. Чазак даргазының оралакчызы Органа Натсак өске ажылче шилчээш, эки тура-биле халашканы билдинген. 

 «Күш-ажыл болгаш социал политика сайыды Сенгии Саида Хертековнаны Тыва Республиканың Баштыңының социал айтырыглар талазы-биле оралакчызынче идип үндүрер шиитпирни хүлээп алдым. Бо үеде чаңгыс командага ажылдап тургаш, доктаамал чурум-биле шиитпирлиг ажылдаар кижи дээрзин көрдүм. Суурларда чурттакчы чоннуң хөй кезии чурттап турар болганда, ол адырда ооң активчи ажыл-чорудулгазын манап тур бис. Оларның бизнес ажыдып алыр аргаларын тургусчуп, тывынгыр чоруун деткип, чон-биле чоок ажылдаары чугула. Оон аңгыда, социал болгаш кижи капиталын хөгжүдер адырда – демография, өөредилге, кадык камгалал, культурага хамааржыр национал төлевилелдер боттаныышкынында контроль база ооң хүлээлгези болур. Чүък улуг. Ындыг болзажок, чаа вице-премьер бистиң моралдыг болгаш эш-хуу деткимчевис-биле ол бүгүдени шыдаптарынга бүзүрээр мен” – деп, Тываның Баштыңы бодунуң шиитпирин тайылбырлаан.

Сенгии Саида Хертековна 1970 чылда Кызыл хоорайга төрүттүнген. 1993 чылда Кызылдың күрүнениң педагогика институдун, 2007 чылда – Россияның ИХЯ Сибирьниң юридиктиг институдун дооскан. 

 1994 чылдан бээр назы четпээннер херектериниң талазы-биле инспектор, назы четпээннер херектериниң талазы-биле улуг инспектор, назы четпээннер херектериниң талазы-биле кезектиң ажылын организастаар килдистиң начальниги, ТР-ниң ИХЯ Кызыл хоорайда полицияның участок төлээлериниң база назы четпээннер херектериниң талазы-биле кезектиң ажыл-чорудулгазын организастаар килдистиң начальниги бооп ажылдаан. 2016 чылда Тываның Өг-бүле болгаш уруглар херектериниң талазы-биле агентилелдиң удуртукчузунга томуйлаткан. 2019 чылдың январьдан республиканың Күш-ажыл болгаш социал политика яамызын удуртуп эгелээн.  

Республиканың Дээди Хуралы Тываның Баштыңының шиитпирин бадылаар ужурлуг. Чаа вице-премьерни чүүлдүг деп көрген соонда, ол «и.о.» чокка ажылын уламчылаар.