Тыва-биле Красноярск крайның аразында культура адырында кады ажылдажылганы шапкынчыларын Шолбан Кара-оол биле Александр Усс дугурушкан

 Тываның Баштыңы Шолбан Кара-оол Красноярск крайга чорааш, хостуг хүрешке «Гран при Иван Ярыгин» делегей чергелиг маргылдааны көрүп, крайның губернаторунуң хүлээлгезин күүседип турар Александр Усс-биле Сибирь федералдыг университетке, культура болгаш уран чүүлдүң объектилерге чорааннар.  

«Бүгү-делегейниң студент оюннарының бүдүүзүнде, культура адырында кады ажылдажылганы идепкейжидерин регионнарның баштыңнары чугаалашкан. Тыва Красноярск край-биле кады ажылдаарынга белен» - деп, Шолбан Кара-оол демдеглээнин enisey.tv-га дыңнаткан. 

Шолбан Кара-оол, Тыва Республиканың Баштыңы: "Күш-ажылы, деткимчези дээш краснояржыларны хүндүлээр бис. Бистиң чогуур ужурлуг найыралывыста болгаш хамаарылгавыста демнежилге сөөлгү чылдарда чиде бергени харааданчыг. Александр Викторович база ооң командазы ол ажылдың чаа девиин тургузар деп санаар мен. Аңаа дең эрге байдалдыг партнерлар болуп кады ажылдаар бис».  

Шолбан Кара-оол биле Александр Усс музейни сонуургап көргеннер: «Мээң эжим, төрээн черинге ханы ынак болгаш, Красноярск крайның культурлуг байлаа — ооң чоргааралы. Албан аайы-биле эвес, а сеткиливистен музейни барып көргенивис онза болду. Бөгүн ында, кайгамчыктыг орус чурукчу, улуг краснояржы Василий Иванович Суриковтуң Сибирь альбомундан шылгараңгай чуруктарының делгелгези ажыттынган. Красноярскиде чаңгыс чер-чурттугларымны бо чоокку хүннерде ол делгелгени албан көөрүн сүмеледим. Хоолгалаан чуруктарны эвес, а уран чүүлдүң езулуг эртинезин сонуургаары дег чүве боор».