Тываның Баштыңы агаарның температуразын болгаш кичээлдерден хостаанының дугайында школачыларга үе-шаанда дыңнадып турарын негээн

 Тываның Баштыңы Шолбан Кара-оол понедельникте, кожуун чагыргалары-биле видеоконференция харылзалыг эрттирген аппарат хуралында, агаарның температуразының дугайында школачыларга үе-шаанда дыңнадырын негээн.  

«50 градус сооктар үезинде, бирги ээлчегде бичии уругларның айыыл чок чоруунче кичээнгейни салырын диледим. Республиканың Өөредилге яамызындан база шупту кожууннар удуртулгазындан чурттакчы чонга агаар-бойдустуң, агаарның температуразының база школачыларны өөредилгеден хостаанының дугайында оперативтиг дыңнадыгны калбаа-биле чарлаарын негеп тур мен. Медээни чүве эрте бээрге эвес, а үезинде дыңнадыры чугула. Бир эвес уруг школада чедип келген болза кичээлдедир бис, а кудумчуга ооң айыыл чок чоруун ада-иелер боттары харыылазын дээн сайыттың болгаш шупту директорларның бодалын хорудум. Тодаргай дыңнадыгны бээри-биле шупту хемчеглерни алырын негеп тур мен» - деп, Тываның Баштыңы Шолбан Кара-оол айыткан.

 Регионнуң удуртукчузу улуг-хүнде, суурдан кыштагже орай үнүпкеш, бир эр база ийи херээжен кижи-биле болган Эрзин кожуунга айыыл-халаптың дугайында дыңнаткан. Трактор орук ара турупкан. Эр кижи дуза дилеп чорупкаш, даңгаар эртен беш шакта чедип кээрге, артып калган кижилер доңгулап каан болган. Тыва Республикада Истелге комитединиң Истелге эргелелиниң дыңнатканы-биле алырга, мөчээн кижилер эзирик болганы баш бурунгаар билдинген. Күш дөгээниниң истери чок, доңуп чок болганы илерээн.  

«Айыыл-халап карак чивеш аразында болур деп чүве бо-дур, чаңгыс чер-чурттуглар. Ырак черже чорууңарны ажыг сооктар эрткижеге соңгаарладып калыңар, далашкан херээ чок. Республиканың Орук-транспорт яамызы база ооң удуртулгазында организациялар автооруктарга чылыгар пунктуларның санын элээн көвүдедерин хандырар ужурлуг. Изиг шугумнуң телефоннары — 8 (39422) 2-99-09 дугаар-биле федералдыг орукта, а 8 (39422) 3-22-62 дугаар-биле республика автооруктарында байдалды дыңнадыр. Энергетиктер электри энергиязын планнаашкын езугаар азы септээр дээш өжүрерин шегледир. Республиканың шупту котельнаяларынга хондур-хүнзедир дежурныйлаашкынны кылыр. Оперативтиг хөделиишкинниң шупту албаннары кезээде белен байдалже шилчээн. 

Онза байдалдарда удуртулга төвүнүң телефоннары бо: 8(39422) 26423, 8-923-267-2112» – деп, Шолбан Кара-оол хурал соонда бижидип алыкчыларынга база катап сагындырган.