Кызылда улуг көвүрүгнү эде-чаартыр төлевилел күрүне экспертизазын эртип турар

 Транспорт инфраструктуразының адырында ажыл-чорудулгалыг "Трансмост" компания Кызылдың улуг көвүрүүн эде чаартыр талазы-биле төлевилел-смета документациязын ажылдап кылган. Амгы коммунал көвүрүгнү ол үеде "Ленгипротрансмост" деп адап турган бо организация 1962 дөзевилеп кылган турган, ам конкурс-биле төлевилелди ажылдап кылыр эргени ойнап алганы ол.  

 Тыва Республиканың Чазаа эде-чаартылга планын боттандырар «орук картазын» бадылаан. Үш чыл дургузунда шупту ажылды кылгаш, ону 2019 чылдың декабрьда доозар ужурлуг. Төлевилелдиң түңү - 1,2 млрд. рубль.  

 Федералдыг бюджеттен ажылдың бирги чадазынче 200 млн. рубльди 2017 чылда тускайлаан, республика 11 млн. рубльди киириштирер. Тыва оон аңгыда төлевилел-шинчилел ажылдарын база акшаландырган. 

 "Күрүнениң тудуг экспертизазы чоруп турар. Төлевилел-смета документациязын, инженерлиг шинчилелдерниң түңнелдерин хынап тур бис. Төлевилел-смета документациязында техниктиг тудугнуң хемчээлдери дээш төлевилел түңнелдери кирген. Ийи дилиндектиг бир көвүрүгнү тутпушаан, амгы көвүрүгнү чаартып, оруктуң хемчээлин II категория чедир экижидер. Кочетов кудумчузунда долгандырыгдан эгелээн ийи дилиндектиг орук хоорайның оң талазында Кара-Хаак – Абаканче угланыр» - деп, «Тыва Республиканың күрүне тудуунуң эргелели» КАА-ның удуртукчузу Александр Галкин тайылбырлаан.  

 Көвүрүгнүң орук шывыы амгы үеде IV категорияга дүгжүр. Бо кыжын Чазактың даалгазы-биле, Тываның транспорт техникуму көвүрүглеп чеже машина хүнде эртип турарынга мониторинг кылырга, 1,5 муң машинага санаан көвүрүглеп 15 муң хире транспорт аймаа эртип турары илереттинген. Көвүрүгнү чаарткан соонда, оон эртер машина саны ийи катап көвүдээр.

  Күрүне экспертизазы август айда доостур, оон эде чаартылга ажылдарын кылыр тудуг организациязын илередир садыглаашкынны чарлаар.  

 Республиканың Баштыңы Шолбан Кара-оол бо чылдың март айда Россияның Чазааның даргазы Дмитрий Медведев-биле ужуражып, орук инфраструктуразының айтырыгларын сайгарып чугаалашкан соонда, дөрт чыл-ла бурунгаар белеткеп эгелээн төлевилелди боттандырар арга тургустунган. 

 Дмитрий Медведев РФ-тиң Чазааның курлавыр фондузундан немелде акшаны 2017 чылда Тывага аңгылаар дугайында айтыышкынга атты апрельде салган. Орук ажыл-чорудулгазын акшаландырарынга немелде дузаламчыны алган чеди регионнуң санынче республика кирген.