РФ биле Моол электри энергиязын дамчыдар дугайында дугуржулганы белеткеп турар

Россия биле Моол ЭДШ азы ГЭС дузазы-биле Моолче электри энергиязын хандырар дугайында айтырыгны көдүрген чазактар аразының дугуржулгазын чарарынга белеткеп турар.  

«Ооң баш бурунгаар өртек-үнези кайы хире болурунга "Росчеткиниң" үнелели бар. Моол коллегаларның ол айтырыг талазы-биле ажылчын бөлүүн тургузарын, энергетика айтырыгларының шупту адырынга хамааржыр Моол-биле чазактар аразының дугуржулгазын белеткеп кылдывыс» - деп, энергетика сайыдының бирги оралакчызы Алексей Текслер Селенгага ГЭС тударынга альтернатива, Моолче «Росчеткиниң» саналдааны ЭДШ тудуу кайы хире өртектиг болурун сонуургаан журналистерниң айтырыынга харыылаан.  

 "Шупту айтырыглар тодараттына бээрге, дугуржулгага атты салыр. Элээн каш айлар эртер деп бодап тур мен» - деп, "Интерфакс" Текслерниң сөстерин дамчыткан.  "Бистиң үнелеливис-биле алырга, ГЭС-ке бодаарга ЭДШ өртээ шакта үш чартык мегаватт эвээш. Ынчангаш гидрогенерация таварыштыр чырык бээринге бодаарга, электри дамчыдылгазының шугуму-биле ону сайзырадыры моол талага ажыктыг. Ол станцияның Байкалга салдары-биле холбашкан айтырыглар безин чокка» - деп, ол демдеглээн.

 "Росчетки" Россиядан электри дамчыдылгазының шугумун ГЭС тудуунга альтернатива кылдыр тударын Моол-биле ооң мурнунда-ла сайгарып турганын дыңнаткан.  

 "Оларга Хакасиядан, Тывадан эгезин алган чырык дамчыдылгазының шугумун тударын сүмеледивис» - деп, российжи компанияның баштыңы Олег Бударгин журналистерге чугаалаан. Ол дээрге 500 кВ күчүлүг бедик вольтулуг электри шугумунуң дугайында чугаа дээрзин менеджер чугаалаан. 

 Амгы үеде чурт 1ГВт ажыглап турар болза, Моол энергия системазының хөгжүлдезинче ам база 1 ГВт-ни киирер. "Сибирьден бүгү Моолду таварты Иркутскиже ээп кээр, бир гигаватт чырыкты дамчыдып болур бис» - деп, ол дыңнаткан. 

 «Моолдуң энергосистемазын хөгжүдер төлевилелди ажылдап кылган бис» - деп, менеджер чугаалаан. Амгы үеде Моолдуң энергетика яамызы-биле чугаа чоруп турар.