Апрель 15-тен Тывада хоорай, суурлар ногаажыдылгазының шалыпчы айы чарлаттынган

 Экология чылында Тывада, апрельдиң 15-тен, чурттакчылыг черлерни ногаажыдар шалыпчы ай эгелээр.  

 Республика Баштыңы Шолбан Кара-оол ТР-ниң Арга-арыг комитединге ону эрттирериниң планын белеткээш, бадыладырын дааскан. Шалыпчы айда ниитизи-биле 2 муң хире ыяштар өзүмнерин күш-ажылчы коллективтерниң, хөй-ниитиниң база школачы арга-арыг ажыл-агыйларының күжү-биле тарыырын ведомство дыңнаткан. Арга-ажыл агыйлары хадылар, шивилер, хадыңнар, талдар база сирень, чодураа дээн ыяштарның өзүмнерин эккээринге белен.

  Шалыпчы айны организастап, эрттирериниң айтырыгларын удуртуп турар Байбек Монгуштуң чугаазы-биле алырга, амгы үеде муниципалитеттер ногаажыдар чер участоктарын аңгылап, тарыыр ыяштарны белеткеп эгелээн. Республика баштыңының бо чылын берген даалгазы - тараан ыяштарның доктаамал суггарылгазын чедип алыры онза кичээнгейде. Ынчангаш участок бүрүзүнге харыысалгалыг коллективтерни быжыглаар.

 Шолбан Кара-оол социал четкиде бодунуң арынында олуртур ыяштарга хамаарыштыр бодунуң бодалын илереткен. Ногаажыдылга акциязының киржикчилери боттарының-на олурткан ыяштарын утпазын сүмелээн. 

 «Апрель 15-ден ногаажыдылганың шалыпчы айы эгелээр. Кижилер аңаа күзелдии-биле киржиринге бүзүрээр мен. Тараан ыяштарны бистиң кургаг агаар-бойдузустан канчаар камгалап алырыл – бир айтырыг ол. Чыл санында олуртуп турар өзүмнерниң чежези мандып үнүп келгенин билип алыр дээш арга-арыг ажылдакчыларындан-даа, администрациялар баштыңнарындан-даа чадаштым. 

 Бир дугаарында, ол арын-нүүрнүң херээ болганда, ону ыйытпас мен. Чаңгыс чер-чурттуглар, азы тарып олурткан ыяштарывысты боттарывыс карактап, камгалаар бис бе? Берти дизе, сугдан ырак черлерде өзүмнерни. Машиналыг кижилер хөй болгай. Ийи хире канистрге сугдан узуп алгаш, тарып каан ыяжывысты орук ара, неделяда оода ийи катап, суггарып каап турар болза, ажырбас боор. Чаа черге дазылы быжыккыже, бир чыл четчир. Канчаарга-даа, боттарывыска дээш тарып турар болгай бис!» - деп, республика Баштыңы ВКонтактыда арында бижээн.