Тываның Баштыңы Шолбан Кара-оол Саглананың авазының байдалын хыналдага алган

 Регион Баштыңы Тыва Республикада уругнуң эргелериниң талазы-биле төлээ Ольга Россова-биле ужурашкан. 

 Төлээ Шолбан Кара-оолга бичии уругнуң авазы Элянора Салчактың байдалының дугайын дыңнаткан. Ырак-узак Тере-Хөл кожуунга 5 харлыг Саглананың таварышкан төөгүзү ооң чоок кижилеринге аар уржуктарны таварыштыра берген. Ооң иезинге удур «улуг назылыг хамаатыларны болгаш назы четпес бичии кижини ээн каганының фактызы-биле» кеземче херээн оттурган. РФ-тиң Истелге комитединиң ТР-де истелге эргелели оперативтиг хемчеглерни чорудуп турар, ооң түңнели-биле суд аваның ие эргезин казып болур.  

 Амгы үеде бичии уруг Кызылда, бо чоокку үеде ооң дөрткү классчы акызы эмчи шинчилгезин эрттери-биле найысылалга келир. Бичии уругну Тере-Хөл кожууннуң өг-бүлеге болгаш уругларга социал дуза төвүнге дүн-хүн чок турар кылдыр чыттырган.

 Байдалды онза контрольга тударын Шолбан Кара-оол Ольга Россовага дааскан, эргежок чугула апарган таварылгада иеге болгаш чаш кижиге дузаны Тываның Өг-бүле болгаш уруглар херектериниң талазы-биле агентилели-биле кады чедирерин айыткан.  

 Бичии уругнуң хөлзээзинни үндүрген төөгүзүн Сергей Шойгу-биле чугаалашканын Тываның Баштыңы Шолбан Кара-оол бодунуң блогунда бижээн:  

 «Уругнуң иезиниң эргезин казыырын кызыдып турарлар. Россияның эң-не кыдыг черинге, бичии кижилерге оон өске арга чок, тайгага төрүттүнүп, өзүп турары дээш бе? Чурттуң ол булуңун бистиң чаңгыс чер чурттугларывыс ээлеп чурттап чоруур. Совет үениң интернаттар системазын сактып келиңер. Кунгуртуг дээн ышкаш ыржым булуңнарда ивижилерниң база малчыннарның ажы-төлүн албадал-биле аңаа чыттырып турган. Оон кымнар үнгенил? Ада-иези ышкаш ажылдап өөренмээн, ажыл-агый орта билбес кижилер болган.
Хоойлуну сагыыры, шын. Маңаа улуг Акывыска каттыжар мен, бөдүүн кижилерниң чурттаарынга таарымчалыг байдалдарны тургузар херек. Бир-ле кижи сылдыстар ажылдап алзын дээш эвес. Кара туразында ындыг чаңнаашкын болбас деп, Сергей Кужугетовичиге чугааладым. Амдыызында ындыг-ла кончуг делгереңгей эвес, истелгеге дорт киржир база эргевис чок. Ындыг болзажок уруглар эргелерин камгалаар бистиң төлээвис-биле кады бодум байдалды контрольда алдым».  

 Ол дидим бичии уруг кыжын кожазында, 4 хире километр черде турар малчын аалга чааскаан баргаш, кырган-авазының мөчээниниң дугайында улуг кижилерге дыңнаткан дээрзин сагындыраал. Авазы-биле соңгу адазы кожуун төвүнче аъш-чем садып чорупканда, караа көрбес кырган-ачазы арткан турган болгаш, ол аалга чааскаан четкен. Бо төөгү социал четкилерге болгаш массалыг информация чепсектеринге янзы-бүрү үр-чарны тарадып, бүгү чуртка дыргын дыңналы берген. «Российская газета» солуннуң коррепондентизи Золик Мильман бо будалчак төөгүнү истээш, «Уруг болгаш сереңги» деп аттыг материалды чырыкче үндүрген.