Шолбан Кара-оол тыва кикбоксерларга Чечняга чедиишкинни күзээн

 Апрель 2-ден 7-ге чедир Грозныйга эртер, Чечен Республиканың бирги президентизи, Россияның Маадыры Ахмат-Хаджи Кадыровтуң чырык адынга тураскаткан Россияның бирги чери дээш маргылдааже чоруурунга белеткенген кикбоксингиге республиканың чыынды командазы - 20 спортчу, 3 тренер база 3 судья-биле Тываның Баштыңы Шолбан Кара-оол ужурашкан. Хүндүлүг аалчының чалалгазын алгаш, республика баштыңы аңаа чораан ол.  

 Тываның чыынды командазы Сибирьниң шилилде маргылдаазында бирги черни ээлээш, маргылдаага киржир путевканы чаалап алган. Февраль ортан үезинде Томск хоорайга тыва кикбоксерлар фулл-контакт баз К-1 кезекке шупту шаңналдыг черлерни ээлээш, 17 алдын, 8 мөңгүн, 8 хүлер медальдарны чаалап эккелген. 

 Чечняга аныяктар ортузунга эртер маргылдаага Тывадан 11 спортчу, оларның аразында 3 кыстар киржир. 18 хардан өрү назылыглар ортузунга маргылдаага 9 кикбоксер күжүн шенээр. Оларның аразында Россия, Европа база делегей чемпионнары, спорт мастерлери, билдингир спортчулар Эчис Сарыглар, Сергек Ооржак база Диана Доктугу бар.  

 Тываның Баштыңы Шолбан Кара-оол спортчуларның белеткелин көрүп, танышкан. Аныянда каратэ-биле шыңгыы белеткенип турган болгаш, бодунуң спортчу чажыттарын үлешкен: "Рингиге төлептиг көстүрүн кижи бүрүзүнге күзеп тур мен, оолдар. Тура-сорууңар, чүткүлүңерден дыка хамаарылгалыг дээрзин шупту билир силер. Силерниң хөөнүңерден, тренер-биле билчилгеңерден, күжүңерни шын санап алырыңардан дыка хамааржыр» - деп Шолбан Кара-оол чугаалаан. Спортчуларны белеткээн тренерлерниң аразында кикбоксингиге Россияның тулган тренери Мерген Монгуш база бар.

  "Рингиже үнер мурнунда, тренеривис Мерген Намчылович эктивис часкааш, «Төлептиг туттун! Бүгү Тыва сени көрүп тур» - деп чагып каарга, шынап-ла, чаңгыс чер-чурттугларың шупту сени көрүп олурар ышкаш боор. Төрээн черивисти кажан-даа уттуп болбас» - деп, Эчис Сарыглар чугаалаан. Тываның Баштыңының даалгазы-биле чыынды команданың кежигүннерин дерип хепкерген. «Тыва – эрес-дидим чоруктуң девискээри» деп бижиктиг хөйлеңнерни, чаңгыс аай спортчу хептерни, рингиге шашкылажыр тускай хепти база үлээн.