Тываның көдээ школаларынга ажылдаар күзелдиг орус дылдыг башкыларга ээлчеглиг конкурсту чарлаан

 Көдээ школаларга ажылдаарынга белен орус дылдыг башкыларга Тываның Баштыңының грантызынче чылдың-на эртер конкурс эгелээн.  

 ТР-ниң Өөредилге яамызының комиссиязы ооң мурнунда чылдарда ышкаш, 10 башкыны шилип алыр. Россия Федерациязының кайы-даа регионундан башкылар, тускай мергежилинден хамаарылга чокка, грантыже кордап болур. Кол негелде – 3 чылдан эвээш эвес башкы стажтыг болуру. ТР-ниң Өөредилге болгаш эртем яамызы конкурс шилилдезин эрткен кижи-биле Тываның көдээ школаларынга 5 чылдан эвээш эвес хуусаада ажылдаар керээни чарар. Тываның бюджединден оларга 1 млн. рубльди төлеп бээр. 

 2014 чылда республика Баштыңы Шолбан Кара-оолдуң саналдааны-биле, орус башкыларны хаара тудар программа ажылдап эгелээнин сагындыраал. Хөй кезиинде тыва чурттакчылыг көдээ суурлар школаларынга орус дылдың хүрээлелин тургузары – төлевилелдиң сорулгазы. Специалистерниң бодалы-биле алырга, дээди өөредилге черлеринче кирип шыдавазының база чамдык эртемнерге чыдып каарының чылдагааны - орус дылды кошкак билиринде, ынчангаш ону эдер дээш орус дылдыг башкыларны хаара тудуп турар.  

 Тываның төлевилелинге киржир күзелдиглер ооң боттанылгазының бирги чылында-ла тыптып келген. Аңаа Красноярск база Пермь крайларның, Иркутск облазының, Башкортостан Республиканың башкылары чагыгны киирген. Бөгүн республиканың көдээ школаларында конкурстуң 6 тиилекчизи ажылдап турар. Грант алыкчыларының эвээш саны - кордакчыларга шыңгыы негелдеде деп, ТР-ниң Өөредилге яамызы тайылбыраан.

 «Республикага анаа-ла эки башкылар эвес, а төрээн эвес дылын шиңгээдип алырынче уругларның сонуургалын оттуруптар тывынгырлар херек» - деп, сайыттың оралакчызы Елена Хардикова демдеглээн. 

 Республиканың эрге-чагыргазы төлевилелдиң киржикчилери болур орус башкыларга грантыдан аңгыда, деткимчениң өске хевирлерин база көргүзер. Тываның Баштыңының айтыышкыны-биле, оларны чиигелделиг коммунал ачы-дузазы болгаш бажың одаарынга халас хөмүр алыр хамаатылар категориязында киирген. 

 Грантыже кордакчылар июнь 10-га чедир Өөредилге яамызынче документилерин дужаар. Ооң соонда 15 хонук дургузунда комиссия ону өөренип көргеш, кижи бүрүзүн чугааже чалаар. Конкурстуң тиилекчилерин ооң түңнелдери-биле илередир.