Тываның социал төлевилелдеринге «Межегейхөмүр» киржир

 Тываның Баштыңы Шолбан Кара-оолдуң республиканың социал төлевилелдеринге элээн идепкейлиг киржир дугайында саналын Евразхолдингиниң «Межегейхөмүр» компаниязы хүлээп алган. 

 Чазак Даргазы компанияның чиңгине директору Сергей Франк-биле ужурашкаш, ындыг дугуржулганы чедип алган. Тываның аныяктарындан хөмүр-даш үлетпүрүнге ажылдаар кадрларны белеткеп база ажылга хаара тударынга, бодунуң штадынга тус черниң аныяктарын ажылга хүлээп алырының үлүүн улгаттырарынга чөпшээрелди компания берген деп, Шолбан Кара-оол ужуражылга соонда бодунуң блогунда бижээн. 

 «Хөмүр-даш бүдүрүлгезинге тус черниң чурттакчыларындан специалистерни ажылдадыр дугайында, база ол ышкаш бистиң абитуриентилеривистен кадрларны белеткээр талазы-биле дугужулганы күүседир дугайында бодумнуң негелдемни база катап айыттым. Кылдынып турар чүүлдер бар, ындыг болзажок, кады ажылдажылганы ам-даа шапкынчыдарын, кол-ла чүүл – ажылдың вахта аргазын эмин эртир ажыглавазын, а социал эки эгелээшкин-биле ажылдаарын дугуруштувус» – деп, улуг инвестиция компаниязының топ-менеджери-биле болган чугааның дугайында Тываның Баштыңы чугаалаан. 

 «Межегейхөмүр»-биле дугуржулганы бирден бирээ чокка сайгарар дугайында Шолбан Кара-оолдуң айтыышкынын сонуургалдыг шупту яамылар алган. Компанияның штадынга 15 хуудан эвээш кезиинге тыва специалистерни болгаш ажылчыннарны ажылдадыр айтырыгны компания-биле кады «орук картазын» ажылдап кылыр даалганы Экономика яамызынга, Күш-ажыл яамызынга, Энергетика яамызынга база Өөредилге яамызынга берген. Оон аңгыда бүдүрүлгениң менеджмени-биле, хөмүр-даш үлетпүрүнүң ажылдакчыларынга Дус-Хөлге санаторий, Кызылга буддийжи комплекс тудуу дээн ышкаш, республиканың социал төлевилелдерин боттандырарынга «Межегейхөмүрнүң» курлавырларын хаара тударының айтырыын база чугаалашкан.  

 Тывада кокстуг хөмүр-даштың Межегей чыдынын шиңгээдиринге Роснедрниң конкурузун 2010 чылда "Межегейхөмүр" КХН ойнап алганын сагындыраал. Бо үеге чедир төлевилелче инвестиция киирилдезиниң ниити хемчээли 7,5 млрд. рубль четкен. Компания тывышты эгелээринге херек инфраструктураны тургускан: подстанция, котельная, арыглаашкын тудуглары, септелге-механиктиг мастерская, ажылчыннарга ниити чуртталга бажыңныг барып-кээр суурну туткан.  

 Амгы үеде 240 метр чедир шөйлү берген уургайның тудуун 2013 чылдан эгелээн. Аразында тудуштурган черлерлиг, ам-даа 700 метр черни эртер. 2016 чылдың төнчүзүнде уургайны бүрүнү-биле ажыглап эгелээрин планнаан.  

 Бо хүнде ара-ара болгаш таваржыр чыдыннардан хөмүрнү казып турар. 2016 чылдың 10 айында 343,1 муң тонна хөмүр-дашты казып, тыпкан. Бүдүрүлге бүрүн күжү-биле ажылдап эгелээрге, чылда-ла 7,7 миллион тонна хөмүрнү казар.