Тываның баштыңы Шолбан Кара-оолдуң адында төрүттүнген хүнү-биле байыр чедириишкиннери келгилээн

 Тываның Баштыңы Шолбан Кара-оол бөгүн, июль 18-те, 50 харлаан юбилейи-биле байыр чедириишкиннерин алган.  

 1998 чылда Тываның Дээди Хуралының депутадынга соңгуттуруп, 32 харлыында ооң спикери апарып, политикага келгенин сагындыраал. Россияның Президентизи Владимир Путинниң сүмелээни-биле, республиканың парламентизи ону 2007 чылда, регион чазааның даргазы албан-дужаалга бадылаан. Ол-ла албан-дужаалче кандидат кылдыр күрүне баштыңы 2012 чылда томуйлаарга, Тыва Республиканың Дээди Хуралы ийиги хуусаада ажылдаар чөпшээрелди берген.

  Россияның Президентизи Владимир Путин Шолбан Кара-оолдуң удуртулгазы-биле республика социал-экономиктиг хөгжүлдеде көскү чедиишкиннерни чедип алганын демдеглээш, Тываның Баштыңының хуусаадан эрте соңгулдаларынга киржир дээн шиитпирин ооң юбилейлиг чылында деткээн. Федералдыг болгаш регионнар политиктери Тываның Баштыңын юбилейи-биле байыр чедирип тура, регионда националдар аразында билчилгени болгаш политиктиг турум чорукту кадагалап арттырарда Шолбан Кара-оолдуң ачы-хавыяазын онзалап демдеглээн. 2015 чылда, РФ-тиң Президентизи ол сорулгаларны чедип алырынга үлүг-хуузу дээш Шолбан Кара-оолду «Ада-чурттуң мурнунга ачы-хавыяазы дээш» орденниң II чергезиниң медалы-биле шаңнаан. 

  "Хүндүлүг Шолбан Валерьевич! 50 харлаан юбилейиңер-биле мээң байыр чедириишкинимни хүлээп ап көрүңер! Тыва Республиканың оон-даа ыңай сайзыралынче угланган силерниң күжениишкиниңерни үнелээн кады ажылдап чоруур эш-өөрүңерниң ортузунда алдар-аттыг силер. Чаңгыс чер чурттугларыңар силерниң дыка хөй эгелээшкиниңерни болгаш губернатор төлевилелдериңерни деткип турар. Регионнуң экономиктиг күчүзүн быжыглаары, хоочуннарның болгаш инвалидтерниң социал болгаш эмчи хандырылгазын экижидери, чедингир болгаш таарымчалыг чурттаар оран-сава-биле аныяк өг-бүлелерни хандырар – оларның төнчү сорулгазы ол. Тывага кижилер эки чурттазын дээш силерден хамааржыр бүгү-ле чүүлдерни ам-даа кылырыңарга бүзүрээр мен. Силерге кадыкшылды болгаш чедиишкиннерни күзедим!

  Россия Федерациязының Чазааның даргазы, Дмитрий Медведев".