Тываның төлептиг чемпиону

Апрель 24-те, Кызылдың № 9 школа-гимназиязынга Тываның Баштыңы Шолбан Кара-оол тус школаның 7-ги клазының өөреникчизи, Россияның элээди уруглар аразынга бокс маргылдаазынга чемпион атка төлептиг болган Алантос Кууларга байыр чедирери-биле ужурашкан.
      Онза төөгүлүг ужуражылгага Тываның Баштыңы Шолбан Валерьевич маадыр кыска болгаш чыглып келген башкылар болгаш өөреникчилерге байыр чедирип сөс алгаш: «Бистиң аравыста чараш кызывыс Алантос Тыва чуртувусту чайынналчак чедиишкини-биле бедик деңнелче көдүрүп, Россия чергелиг спортчу маргылдаага диңмиреткенинге канчап өөрүвес боор. Бо хүнде бис шупту чедиишкинниг болур деп бодаар болзувусса, бир дугаарында, ажы-төлүвүс арага-дарыдан, чыдыг таакпыдан ырак турар болза, бистиң келир үевис ажык деп чүүл билдингир. Ынчангаш Алантоска байырны чедирбишаан, ооң тиилелгезин ажыглап, силерни шуптуңарны спортче кыйгырып тур мен. Бодум база школага өөренип чорааш, спортка хандыкшылдыг чораан мен. Чүге дизе мээң башкыларым биске быжыг турушту көргүзүп, өөредип чораан. Спортка ынак, хандыкшылдыг чоруур болзуңарза-ла, өөредилгеңер-даа эки болур, келир үеде ажыл-агыйыңарга-даа чедиишкинниг болур силер. Ынчангаш Алантостуң тиилелгези дээрге, 9 дугаар школаның алдары-дыр»— деп чугаалаан.
     ТР-ниң Чазааның Даргазы Шолбан Кара-оол байыр чедиргениниң соонда тиилекчи спортчу Алантос Кууларга эң-не улуг тиилелгези дээш «iphone 5» смартфон биле электроннуг номну белекке берген. Республиканың Баштыңының холундан белек алыр аас-кежикке онаашкан чемпион аныяк кыс Алантос, бодунуң ээлчээнде, өөрүп четтириишкинниң сөстерин илереткен. Ол моон-даа соңгаар Тыва чуртунуң, школазының, ада-иезиниң, тренерлериниң, башкыларының адын бедик тудары-биле ам-даа улуг тиилелгелерни чедип алыр дээрзин даңгыраглаан.

Валерия Конгар.
А-Х. Арыкааның чуруктары