Тываның Баштыңы дээди өөредилге чериниң бирги курсчузунга амгы үениң смартфонун белекке берген

 Тываның күрүне университединиң бирги курсчузу, 18 харлыг Сай-Суу Дамба эрткен чылын «Өг-бүле бүрүзүнге – бирден эвээш эвес дээди эртемниг уруг» губернатор төлевилелиниң киржикчизи болган. Көдээде хөй ажы-төлдүг база эвээш орулгалыг өг-бүлелерден оолдар, кыстарга дээди эртем чедип алыр арганы берген, эрге-чагырганың деткимчези-биле боттандырып турар ол төлевилел дээш өөрүп четтиргенин, ол студент кыс илереткен.

 Тываның Баштыңы Шолбан Кара-оол «политехтиң» ниитиниң чуртталга бажыңында оолдар-биле ужуражып чорааш, студент кыстың өөрэлинге аалдап четкен.

  Сай-Суу Дамба Чаа-Хөл кожууннуң Булун-Терек суур чурттуг. Ол инженер-техниктиг факультеттиң «Автомобильдер болгаш автомобиль ажыл-агыйы» мергежилинде өөренип турар. Физика-математика башкызы болур алыс күзелин, ол республиканың баштыңынга илереткен. Ынчангаш физматче шилчидип алыр бе азы инженер-техниктиг факультетке хевээр артып каар бе деп, шилилгеде. Шолбан Валерьевич Кара-оол эки боданып, шын шиитпирни хүлээп алырын аңаа сүмелээн. 

 Республика Баштыңы-биле чугаалажып олура, Сай-Суу ажыл-ишчи ада-иезин таныштырган. Авазы көдээ библиотекада аштакчы, а ачазы бажың ажылында. Өг-бүле беш ажы-төлдүг. Улуг угбазы Кызылдың тудуг техникумун дооскан, артканнары - өөреникчилер.

  «Өөренип алгаш, дуңмаларымны өрү тырттар мен. Бистиң өг-бүлевисте дээди эртемниг кижи чок. Ынчангаш дээди эртемни албан чедип ап, ажылдаар мен» - деп хүлүмзүрбүшаан, Сай-Суу чугаалаан. 

 Сай-Суунуң эки өөредилгезин база тура соруун Тываның Баштыңы онзалап мактаан. А Сай-Суу шиңгээдип турары солун эртемнерин сонуургадып, Свороток доктаамының артында, ниитиниң чуртталга бажыңының чанында, чаа, 5 каът өөредилге корпузун ажытканы студентилерге дыка таарымчалыг апарганын өөрүшкү-биле чугаалаан. 

  «Студентилер ам маршрутка-биле чоруп турбас, чанында өөренир черинче чадаг кылаштажы бээрлер. Өөренир корпузувус чаа, чырык, чылыг, кайгамчык. А Чаа-Хөлде чараш, улуг Культура одаан тутканы дээш, четтирдивис! Ам кожа суурларның аныяктары безин шупту ында». 

 Шолбан Кара-оол бирги курсчуга эки өөренирин чагааш, номнар биле өөредилгезинге ажыглап, херектиг информация тып база чоок кижилери-биле харылзажыр кылдыр амгы үениң смартфонун белекке берген. Белекти өөрүшкү-биле хүлээп алгаш, чаа телефону-биле селфиге тырттыргаш, Контактыда бодунуң арнынга салып алырын аазаан. 

 Студент тудуг отрядының кежигүннери база студентилерниң боттарының күжү-биле, хос турган өрээлди тренажер залы кылыр эде дерип алган оолдар-биле чазак даргазы база ужурашкан. Студентилерниң тывынгыр, эгелекчи чоруун Шолбан Кара-оол демдеглеп, бо чоокку хүннерде хүрежир чаа хевистерни эккээрин аазаан. База ол ышкаш Национал музейде «Скифтерниң алдыны» делгелгеже 40 база Национал театрның шиизинче 2 билетти студентилерге берген.