Тываның Баштыңы малдың кыштаглаашкынын болгаш мал оолдаашкынын хайгааралга алырын көдээ ажыл-агый яамызынга дааскан

 Республиканың Баштыңы Шолбан Кара-оол агаар-бойдустуң байдалы-биле, малчыннарга дузаны көргүзерин дааскан. Тывага хенертен чылааш, оон катап сооп эгелээнинден, малдың деңгелинге багай салдарлыг. Бо чылын хар база хөй дүшкен. Ынчангаш көдээ ажыл-агый яамызы, ветеринарлыг албан чери малчыннар-биле кезээде сырый харылзаага турар болза эки.

 Республиканың баштыңы штаб чурумунга ажылды чорудар даалганы берген. Дүн-хүн-даа, дыштаныр хонуктар-даа дивейн, байдалды контрольдаар. Ол харыысалганы оралакчызы Сергей Ондар биле көдээ ажыл-агый сайыды Юрий Тыт-оолга онааган. 

 Республиканың бүгү кожууннарын хаара туткан зона хуралдары чер-черлерге эрткенин Ю. Тыт-оол республика баштыңынга илеткээн. Ооң чугаазы-биле алырга, тус чер чагырга удуртукчулары малдың кыштаглаашкынын боттары хайгааралда алган. 

 Бай-Тайганың Кара-Хөлде бергедээшиннер турган, Сүт-Хөл кожуундан сигенни дарый чедирген. Бии-Хем кожуунда сыын ажыл-агыйы онза кичээнгейде. Ында малдың баш саны чидириг чок, амыр менди. «Каа-Хем» МУБ-та нарын байдал контрольда.

  Республиканың көдээ ишчилеринде мал оолдаашкыны эгелээн. Бо хүнде 12829 баш анай-хураган, 2107 баш бызаа камгалап алдынган.