Тываның найысылалында 280 олуттуг уруглар сады ажыттынган

 Бөгүн Республиканың Баштыңы Шолбан Кара-оол Кызыл хоорайда тудуг шөлдерин хынап көрген. 2013-2016 чылдарда Тыва Республикада озал-ондактыг чуртталга бажыңнарындан хамаатыларны өскээр көжүрер талазы-биле республиканың адрестиг программазын боттандырар чуртталга бажыңнарының тудуун хынаан. База ол ышкаш Спутник микрорайонунда чаа уруглар садының ажыдыышкынынга киришкен. 

 «Сылдысчыгаш» 9 дугаарлыг уруглар садында 14 бөлүкке база бир кадыкшылга бөлүүнге шупту 280 уругну хүлээп алыр. Тываның Баштыңы кижизидикчи башкыларга, ада-иелерге, чаштарга үрде манааны онзагай болуушкун-биле байырны чедирген. Улуг эвес найырлыг программаның соонда, кызыл кожааны байырлыг байдалда үзе кескен. 

 Республиканың Баштыңы чаа уруглар садының шупту өрээлдерин кезээш, ажылдаарынга коллектив бүрүнү-биле белен дээринге бүзүрээн. Назы четпээн уруглар албан чериниң каасталгазы эки үнелелди алган. Чырык, чылыг, таарымчалыг байдалдарны чаштарга тургусканы көскү. Чазак Даргазы Шолбан Кара-оол чайын берген сагындырыгларын эдип, ажылды эки чорутканы дээш, коллективке өөрүп четтиргенин илереткен. 

 Уруглар сады ийи корпустан тургустунган. Бирги оран-сава административтиг: ында чем кылыр, хеп чуур черлер, эмнелге блогу, административтиг ажылдакчыларның кабинеттери, музыка болгаш спортчу залдар, 6 бөлүктерге өрээлдер, оларның дөртү - бичии бөлүктүң 1,5 хардан 3 харлыг уругларынга. 

 Ийиги корпуста 3-7 харлыг уругларга 8 бөлүктүң өрээлдерин тускайлаан. Оон аңгыда логопедтиң, экологтуң, психологтуң база методиктиг өрээлдерни аңгылаан. 

  «Сылдысчыгаш» уруглар сады автономнуг албан чери болгаш, өөредилге программазындан аңгыда, ада-иелерниң күзели-биле уран чүүл-эстетика угланыышкынынга – уран чогаадылга бөлгүмнери, коррекциялыг-сайзырал угланыышкынынга – психолог, логеопед башкыларның, эстетиктиг угланыышкынынга – хореография, ыры ансемблиниң, интеллектуалдыг-сайзырал угланыышкынынга – номчуп өөредириниң база школага белеткээриниң немелде өөредилге ачы-дузаларын көргүзер. 

 35 кижи санныг хандырылга ажылдакчыларын четчелээн, оларның ортумак назы 32 хар.

 Чаштарга чоннарның культуразын, улусчу ужур-чаңчылдарын өөредири-биле «Орус бажың» кабинедин база уруглар садының девискээринде «Өгнү» тургускан.

 «Күртудугчагыг» КА чери уруглар садының иштики дериг-херекселин, чем кылыр, хеп чуур черлерни, эмчи кабинедин чугула чүүлдер-биле бүрүн дерээн. Уруглар садының штадында 91 ажылдакчы бар, бо хүнде 74 кижи ажылдап эгелээн. 225 чаш уруглар садының бичии ээлери болган. 

 Спутник микрорайонунда чурттап турар 52 уруг өске уруглар албан черлеринден шилчип кээр, санаторлуг бөлүк 15 уругну хүлээп алырынга белен. 

 Бо чоокку хүннерде 280 олуттуг база бир уруглар сады Кызылга ажыттынар.