Тываның Чазааның Даргазының агроүлетпүр талазы-биле оралакчызынга Сергей Ондарны, юстиция херектериниң талазы-биле сайыдынга Анна Абрамованы томуйлаан

 Бөгүн аппарат хуралынга Тываның Баштыңы Шолбан Кара-оол агроүлетпүр талазы-биле чаа оралакчызы Сергей Конзан-оолович Ондарны таныштырган. Ол күш-ажылчы оруун «Карл Маркс» совхозтуң кол агрономундан эгелээш, Сүт-Хөл кожууннуң Баян-Тала суурнуң «Октябрьның 30 чылы» совхозтуң директору, ТР-ниң көдээ ажыл-агый сайыдының бирги оралакчызынга чедир ажылдаан. 2009 чылдан 2014 чылга чедир Сергей Ондар яамының үнүш ажыл-агый хөгжүлдезин болгаш кадрлар политиказын харыылап турган. Чазак Даргазының оралакчызы Тываның Дээди Хуралынга (парламентизинге) томуйлаашкынның бадылаашкынын база эртер. 

  Тыва Республиканың Юстиция херектериниң талазы-биле яамыны Анна Абрамова удуртур. Ооң күш-ажылчы ажыл-чорудулгазында 1985 чылдан 2000 чылга чедир юстиция сайыдының бирги оралакчызы, 2003 чылдан ТР-ниң Арбитраж судунуң судьязы, оон ТР-ниң Дээди судунуң даргазының оралакчызы, ТР-ниң Дээди судунуң даргазының оралакчызы-судья албан дужаалдар бар. 2012 чылдан бээр Анна Абрамова Тыва Республиканың Дээди Хуралында (парламентизинде) Тываның Баштыңының бүрүн эргелиг төлээзи бооп ажылдаан. 

 Республиканың көдээ ажыл-агыйынга каңдаашкынның чедирген когаралының хемчээлин дарый тодарадыр база Тываның суггарылга системазын хөгжүдер талазы-биле хемчеглерни алырын Сергей Ондарга дааскан. Юстиция херектериниң талазы-биле сайыт Анна Абрамовага республика чазааның хоойлужудулга ажыл-чорудулгазынче онза кичээнгейни углаарын айыткан. 

 ТР-ниң Чазааның Даргазының көдээ ажыл-агый блогун Сергей Ондарның мурнунда Шолбан-оол Иргит кураторлап турганын сагындыраал. Ол эрткен неделяда халашкан. А ТР-ниң юстиция херектериниң талазы-биле сайыды Шолбан Монгуш регионнуң федерелдыг инспекторунга томуйлаткан.