Шаңналдарны тывыскан

ТШО-нуң киржикчилеринге Кызыл хоорайның Төлээлекчилер хуралының депутаттары шаңналдарны тывыскан. Дайынчыларның аразында чем кылыр повар, удуртукчу дарга, камгалакчы дээш кандыг-даа мергежилдиг, кайда-даа ажылдап чоруур хамаатылар бар. Олар шупту маадырлыг чоруун көргүзүп, тускай шериг операциязынга төлептии-биле киришкен дээрзин Аяс Лопсан демдеглээн.

Кызыл береттиң эдилекчизи, дайынчы хөделиишкиннерниң хоочуну, Росгвардияның ажылдакчызы Айдыс Донгакка, ногаан береттиң эдилекчизи Хеймер-оол Тейнинге, дайынчы хөделиишкиннерниң хоочуну Эртине Кара-Салга, 55-ки мото-адыгжы (даг) бригадазының ажылдакчызы Херел Сагдыга, Эрзин кожууннуң чурттакчызы эки турачы Айдан Севилбаага, кызыл береттиң эдилекчизи, «Ада-чурт камгалакчызы» күрүне фондузунуң ажылдакчызы Азият Догдугашка, эки турачы Шолбан Тюлюшке оларга хүндүлел бижиктерни болгаш хөрек демдектерин тывыскан.

Эрес-дидим чаңгыс чер чурттуг акылары-биле кады Кызыл хоорайның чурттакчызы, 16 харлыг Найыр Салчак база бөгүн шаңнал алыр аас-кежиктиг болган.

Чоокта чаа Кызыл хоорайның төвүнге бижек туткан хамааты каржып эртип чыткан херээжен кижиниң сумказын ушта соп, бижек-биле коргуткан. Ук болуушкуннуң үезинде Найыр ол девискээрге чорааш, эрес-дидим, коргуш чок чоруун көргүзүп, кем-херек үүлгедии кылып турган хамаатыны тударынга дузалаан.

Найырның авазы Алдынай Салчак: – Найыр ийи оглумнуң бичиизи-дир. Оглум он харлыында бокс секциязынче барып эгеледи. Найыр ам Сибирь федералдыг округтуң спорт мастеринге кандидат. Тыва кадет корпуска 9-ку классты дооскаш, амгы үеде Кызылдың кооперация техникумунуң экономика салбырында өөренип турар. Бичиизинден-не черле шимченгир, чугаакыр, эш-өөрзүрек, бөдүүн сеткилдиг оол чүве. Интернет четкизинге тарай берген видеону көргеш, «Соок чепсек туткан кижи чаңгыс карбаш дээш шанчып болур, айыылдыг. Ында чүге чеде берген сен» – дээш, оглумну чемелеп турдум. Ие кижи черле төлүн бодаар болгай. «Ак бажың даштынга аныяк уруг ышкаш амы-тынындан чарылза канчаарыл, канчап дузалашпас мен, авай» – деп, оглум харыылаар болду.

Найыр Салчак: – Акыларым-биле чемненип алыр дээш кылаштажып бар чораан бис. Хенертен бир угбай алгыра бээрге, көрнүп келиривиске, чурум үрекчизи ол угбайны бижек-биле коргудупкаш, сумказын ушта соп алды. Ол үеде шагдаа келгеш, когараан угбайны эртип чыткан машинаже олуртупту. Бижек туткан хамааты шагдаадан дезимзиреп эгелээрге, кады чораан

акыларым ынатпайн турда-ла, черле дузалажыптайн, буян болур ыйнаан дээш дузалажыпканым ол-дур ийин.

Кызыл хоорайның Төлээлекчилер хуралының депутаттары Аяс Лопсан болгаш Буян Биче-оол «Бөгүн кады шаңнал ап турар дайынчы акыларың ышкаш, эрес-дидим езулуг маадыр болур сен, Найыр!» деп йөрээл сөстер-биле шаңналды Найырга тывыстылар.

Айдың ОНДАР.

«Шын» солун

Ада ТЮЛЮШТУҢ тырттырган чуруу.

Краткий перевод

Награды вручены

Депутаты Хурала представителей Кызыла вручили награды участникам СВО. Среди воинов встречаются есть люди различных профессий: повара, руководители, адвокаты и другие. Все они героически приняли участие в СВО – отметил Аяс Лопсан.

Почетные грамоты и нагрудные знаки вручены работнику Росгвардии, обладателю крапового берета и ветерану боевых действий Айдысу Донгаку, обладателю оливкового берета Хеймер-оолу Тейнину, ветерану боевых действий Эртине Кара-Салу, работнику 55-ой мотострелковой (горной) бригады Херелу Сагды, добровольцу, жителю Эрзинского района Айдану Севилбаа, работнику госфонда «Защитники Отечества», обладателю крапового берета Азияту Догдугашу и добровольцу Шолбану Тюлюшу.

Наравне со старшими товарищами-героями награды удостоился и 16-летний Найыр Салчак, который оказал содействие в задержании вооруженного ножом грабителя.

Награждая Найыра, депутаты Аяс Лопсан, и Буян Биче-оол пожелали ему быть такими же отважными, как участники СВО.