МААДЫРЛЫГ АДАШКЫЛАР – ДОСПАННАР

Тускай шеригжи операцияны чарлапканындан бээр бир чыл чеде берген. Бистиң Тываның эрес-дидим оолдары, адалары чуртта тургустунуп келген байдалды шын билип, боттарының дайынчы үлүүн эрес-дидими-биле киириштирип турарлар. Чыл дургузунда тускай шериг операциязынче боттарының изиг күзели-биле-даа чоруп турарлар бар, дайынчы шериг хүлээлгезин күүседири-биле кыйгыртканнар-даа бар.

Эрес-дидим дайынчыларның одуруунга Доспаннарның өг-бүлезин киириштирип болур. Тускай шериг операциязынга бо өг-бүледен үш адашкы үжелээ киришкеш келген. Өгнүң ээзи Саян Николаевич Доспан 55 дугаар мото-адыгжы бригаданың дайынчызы. 2022 чылдың күскээр тускай шериг операциязынче киржип чоруткан. Дайынчы хүлээлгезин күүседип тургаш, балыглангаш төрээн Тывазынче чанып келген. Эмнээшкинни эрткеш, бо февраль эгезинде шериг операциязынче кыйгырты  бээрге, катап чорупкан. “Дайынчы хүлээлге кончуг” деп эр улустуң даңгыраа бар болгай.

Улуг оглу Валентин Шагаан-Арыгның 2 дугаар школазын дооскан. Ол баскетболга шыырак ойнакчы. Школа соонда шериг албан хүлээлгезин эрттиргеш, улаштыр шериг кезээнге керээ чарып алгаш артып каан турган. Кажан 2022 чылда тускай шериг операциязы чарлаптарга, Украинага дайынчы хүлээлгезин эрес-дидим күүсеткеш, амыр-менди чанып келген.

Ортун оглу Валериян база-ла Шагаан-Арыг 2 дугаар школаның доозукчузу. Ол школаның тергиин эки өөреникчизи, 11-ги классты 4-5 демдектерге дооскан. Математика эртеминге кончуг шыырак, хүреш спортун сонуургаар,  чуруттунарынга база сундулуг. Школа дооскан соонда шериг албан хүлээлгезин эрттирип чоруткаш, улаштыр тускай шериг операциязынга таваржып,  дайынчы хүлээлгезин “изиг точкага” эрес-дидими-биле эрттиргеш келген. Валериянның чоруп олурганы шериг колонназы частыышкынга таваржы берген, аңаа аар балыгланган эжин айыыл- халапка чааскаандырзын кааптавайн, эжин чүктеп чорааш айыыл чок черге эккеп, амы-тынын камгалап каан. Ооң маадырлыг чоруун командылалы үнелеп, “Эрес-дидим чорук” ордени-биле шаңнаан. Чаа-ла 19 харлапкан оглувус шак мындыг маадырлыг чоруун көргүскен. Валериян ам төрээн Улуг-Хеминде чанып келген. Ол школа дооскаш “МЧС” черинче өөренир күзелдиг турган. Ам дайынчы хүлээлгезин күүседип кааш келгенде, бодунуң күзелин чедип алыр сорулгалыг. Маадырлыг оглувус Валериянның  күзели бүдер болзун.

Чуртта бо берге байдал бүгү чонга улуг шылгалда болуп турар. Эң ылаңгыя аваларга, душтук кыстарга тускай операция чоруткан кижилери дээш уйгу-чыдын чок сагыш-човаашкын, дүвүрел, манаашкын аар эртип турарын билир бис. Бо үш адашкыны өөнге манап олурган ие – Урана Михайловна база маадырлыг ава. Бо хүнде үш оглу – Валентин, Валериян, бичии 7 класс оглу Денис өөнде, аваның сагыш-сеткили ам-на оожургаан боор.

Февраль 23 – Ада-чурт камгалакчыларының хүнүн база Шагаа таварыштыр бо маадырлыг дайынчы адашкыларга быжыг кадыкшылды, өөрүшкүнү, өлчей-кежикти, сүлде-сүзүү бедик чоруурун, бурунгаар сорулгаларын чедип алырын күзедивис!

«Улуг-Хем солуну», 23.02.2023 чыл.